رساله الى العراق وحكام العراق

بوطنه الامهات معصبات و لابسات الحزن احله كلادة



و بوطنه الدمع شك خد الايتام و الضحك شكك حلوك القادة



الحمد لله كلت من راح صدام الحمد لله كلت بس عل سلامة



اشو ياهو التكضة صار صدام و اكو صدام بس لابس عمامة



سفينة الوطن يمشي و دمنه نهران و احله شراع اله ذراعان ادينه



و بالكرسي طلع مو خوش قبطان مو بس هاي يضحك عل سفينة



درينه اهل الكراسي تحرس الناس بس تبوك بيهم ما درينه



دوم ابن الفقير بجفن ملفوف وابنهم يكبر و بعده بحضينة



المثل ذولة اذا ماتوا حرامات و جريمة يتم دفنهم يم علينه



عراقيين صرنه ملوحة للموت و ما يستلذ كلش اله بينه



و موت الله انلغة بهل بلد فد نوب و عزراييل هم بدل علينه



يحلالي العتب يا وطن وياك لإن بس الاحبهم عاتبتهم



و تدري شكد احبنك و اهواك بكد ناسك الفقرة العذبتهم



بصغري كالوا اطلع تره يأذيك و صدك اذيتني و ما صدكتهم



و حلموا بيه اكرهك يا وطن يوم جي حلموا اكرهك كاومتهم



اهلي من طحت فزعولك ركاض عثروا بيك تالي و طيحتهم



و وليت اهلي ذبح و جمالة اكلك خو ما تعبوك من ذبحتهم



المو ولدك ارتاحوا يا وطن بيك و ولدك على العالم طشرتهم



و لدك علكوك كلادة عل جيد و انته عل المشانق علكتهم



اجه راس السنة و رادوا يشبكوك اكطعت راس السنة و ما شابكتهم



بحروبك قدمولك احله الاعمار من صار السلم ليش اعلستهم



و حركوا روحهم من كلت بردان و دفيت و صاروا رماد و دستهم



انبتروا من كلت محتاج رجلين من احتاجوا ايدك رجعتهم



من الزمت قلمك صاروا اوراق و من كد ما تشخبط شككتهم



صارولك ورد ضنوك فلاح ما تعرف تشم ليش اكطعتهم

الصقر الجارح

العراق يرد

لا تقفل قفل وتحسبة مامون اذا ترهم عليه كومة مفاتيح
ولتعاتب نخل ما حمل عثوك خطيت النخل بركاب الفلاليح
اذا مركب شلة وحب ايد الكياش مو صوج النهر صوج الملاليح
واذا شطك حطب وجروفة نيران بعد تعتب عليمن علسوابيح


شكرا لك اخي على هذهِ الرسالة الشعرية الجميلة بحزمها

تحيتي لك

ذله بذلة نكضي الليل منــــــام
والبصبح بالمدرسه ندرس كرامه


ووالدنه الوطن بابا نــــــــــسميه
شو بابا عدل واحنةيـــــــــــتامه


عجيب شكد أيمة يا وطن بيــــك
ووجهك للرحم ما بيه علامـــــه


عجيب وبيك ابو فاضل العباس
عنده جف ولا عندك شهامــــــه


ممنوع التجول يا وطن بيـــــك
لان حتى الدرب ساحب اقسامه


وشمل منع التجول حتى العظام
والدم ماكدر يمشي بعظامــــــه


حمام الناس ونته يا وطن حوم
منك ما اظن تسلم حمامــــــــة


انت بروفيسور بقبض الارواح
وعزرائيل الك دنك الهامـــــــه


يوميه قيامه يا وطن بيـــــــــك
اذن كلش سهل يوم القيامـــــه



تحياتي
الصقر الجارح